21 Abril 2016

Club Merlín II

cartas a lelo

Co pasar do tempo os fillos independízanse, os pais morren, os desexos e ilusións debilítanse, pero… os verdadeiros amigos sempre estarán aí.

Dedicaremos as próximas lecturas e comentarios ao tema da amizade.

Próxima reunión o luns 25 de abril.

Comentarios desactivados en Club Merlín II

27 Febreiro 2016

Club Merlín II

O próximo luns día 29, coa proxección da película “A familia Bélier”, poñeremos fin á temática sobre a que xiraban as última lecturas: os principais axentes transmisores de educación e valores.

Propoñemos como tema de reflexión e debate o coñecido como “síndrome do niño baleiro”.

Comentarios desactivados en Club Merlín II

24 Decembro 2015

Club Merlín

IMG-20151223-WA0000

Boas festas e boas lecturas.

Vémonos o 25 de xaneiro

Comentarios desactivados en Club Merlín

25 Novembro 2013

Club Merlín: 1ª sesión

O luns 28 outubro 2013 comezamos a andadura do club lector Merlín. Un curso máis incondicionais da lectura xuntámonos para compartir momentos en torno aos libros.

Despois da presentación dos participantes as coordinadoras comentaron o plan de lectura para este curso.

Para empezarmos, una novela curta: “A neta do señor Linh de Philippe Claudel. Destapa as desfeitas que produce a guerra, a soidade, e a amizade como salvación fronte á desesperanza. Tamén leremos “El abanico de seda” de Lisa See, La casa del propósito especialde John Boyne, e proxectaremos películas como “Entre copas” de Alexander Payne, Jim Taylor, “Unha pistola en cada mano” de Cesc Gay .

 Finalmente estas son as recomendacións das lecturas de verán do Club lector Merlín.

 Las voces del Pamano (2011) de Jaume Cabré, novela que revolve as entrañas da Guerra Civil e da posguerra, desvela matices que a miúdo pasan desapercibidos e que dan sentido aos feitos históricos e á necesidade de manter viva a súa memoria.

 Mala gente que camina (2006) de Benjamín Prado (Madrid, 1961), trata un tema tan actual e dramático como é o roubo de nenos

 Operación Gladio (2011) novela de espías na que se indagan algúns dos sucesos máis escuros da Transición española.

La verdad sobre el caso Harry Quebert de Joël Dicker, novela policiaca e romántica, a  verdade só chega ao final dun longo e apaixonante percorrido.

Casa de verano con piscina de Herman Koch, novela que retrata o tempo que vivimos, reflexión sobre a ética profesional, a falsidade das relacións sociais, a comunicación entre pais e fillos, os límites da liberdade sexual ou o sentido da culpa no seo dunha sociedade permisiva e autocompracente.

Una temporada para silbar  (2011) de Ivan Doig . Axúdanos a descubrir os auténticos vaqueiros de Montana de principios do século XX. “No cocina pero tampoco muerde”. Así comeza o anuncio no que Rose Llewellyn, unha viúva de bos costumes, se ofrece no outono de 1909 como ama de chaves.

 La cena de Herman Koch(2012). Ata onde é capaz de chegar un pai para encubrir o seu fillo, que comete un delicto inxustificable? Debe prevalecer o instinto de protección paterna ou a lealdade a unhas normas sociais que garanten a coherencia e a fortaleza de grupo? Estas e outras preguntas xorden durante a lectura de “La cena”, unha novela aceda e provocadora que apunta sen miramentos a toda unha clase social acomodada.

 El tiempo mientras tanto  de Carmen Amoreana (2010). Son moitas as mulleres que adoitan vivir unha vida de novela. Esta é unha historia de mulleres unidas por lazos de amizade, de amor e de familia e que, a pesar diso, se converten en descoñecidas. Só unha mirada dende a distancia lles axuda a recompoñer o seu propio mapa vital.

 Palmeras en la nieve. Luz Gabás.(2012). En 1953, Kilian abandona a neve da montaña oscense para iniciar, xunto co seu irmán .Jacobo, unha viaxe de ida a unha terra descoñecida e exótica, a illa de Fernando Poo. Nesta terra os irmáns descobren a frívola vida social da colonia en comparación coa vida española do momento. Pero un deles cruzará unha liña prohibida, casar cunha nativa.

 Dejar las cosas en sus días. Laura Castañón (2013). Unha novela de personaxes e historias entrelazadas na mellor tradición das sagas familiares e capaz de crear, á súa vez, episodios da Historia de España do século XX. É unha novela sobre as relacións entre memoria, pasado e identidade. A través de Aida, unha periodista que vive obsesionada con encontrar os restos do seu avó asasinado durante a Guerra Civil, reconstrúe a historia da súa familia, os Montañés, dende que se afincaron en Asturias a principios do século XX para traballar nas explotacións mineiras do Marqués de Comillas, paradigma da paternalismo industrial nun entorno axitado polo movemento obreiro.

 Intemperie. Jesús Carrasco.(2013) O libro narra a fuxida dun neno a través dun país castigado pola seca e gobernado pola violencia. Un mundo pechado, sen nomes nin datas no que a moral escapa  polo mesmo sumidoiro polo que se foi a auga.

 Te daré la tierra .Chufo Lloréns.(2008) A Barcelona do século XI alberga nos seus muros dúas historias marcadas polo drama, o amor e a ambición. Unha novela que une ficción e historia para crear unha cidade na que os pactos, as intrigas de palacio, a ambición comercial e a convivencia entre relixións,tínxense coas emocións mais intensas.

 

 

Comentarios desactivados en Club Merlín: 1ª sesión

7 Febreiro 2013

Fina Casalderrey

A RAG (Real Academia Galega) acaba de elixir a Fina Casalderrey como académica numeraria.
Con Fina entra na Academia unha muller (por méritos propios) pero tamén a literatura infantil e xuvenil. Diso vai tratar o seu discurso de entrada, escoitaremos esas palabras que tratan desta literatura non sempre asumida como LITERATURA (con maiúsculas).
Realmente estamos de noraboa, pois sentímonos moi ben representadas por esta muller que entre outros conta con Premio Nacional de Literatura Infantil e Xuvenil. Unha muller que ademais é mestra (¿acaso se deixa de ser por non ir xa á escola?) e, polo tanto, mediadora do libro. Unha académica de luxo!
Publicado 1 week ago por Asesoría Bibliotecas Escolares

Comentarios desactivados en Fina Casalderrey

31 Xaneiro 2013

Día da Paz

Un ano máis, a partir do 30 de xaneiro, celebraremos o “Día Escolar da Paz e Non Violencia”. Desde a Biblioteca propoñemos diversas actividades por se queredes participar do evento.

  • Que é a paz?
  • Que significado ten a pomba?
  • Biografías de grandes personaxes que destacaron no eido da paz.
  • Paz en diferentes idiomas.
  • Desexos de paz.
  • Concurso de relatos: cando penso na paz penso en …
  • A violencia e os conflitos armados: mapamundi cos conflitos recentes.
  • Proxección de películas para ESO e BAC: “Senderos de gloria”, “Invisibles: Buenas noches Ouma”. “Las tortugas también vuelan”
  • As guerras e os nenos soldado.
  • Cancións que falan da paz.
  • Poemas sobre a paz.
  • Anímate a ler: proposta de libros de interesantes en relación co tema da paz.
  • Ánimate a ver: proposta de películas encol do tema da paz.

 

Comentarios desactivados en Día da Paz

13 Decembro 2012

ENCONTROS CON AUTORES

Para celebrar o día dos Dereitos Humanos, contamos coa presenza de Francisco Castro, autor, entre outros, do libro “O neno can”, que precisamente traballamos no Proxecto Interdisciplinar co alumnado de 1º de ESO.

A charla resultou moi amena e enormemente ilustrativa. Nela achegounos a unha dura realidade que moitos nenos do noso mundo descoñecen, nun intento de espertar no alumnado gana de “cambiar o mundo”.

Se non liches nada deste autor recomendámosche algúns dos seus libros como “O segredo de Marco Polo”, “O ceo dos afogados”, “Chamádeme Simbad”, “Generación perdida”.

Equipo Biblioteca

 

 

Comentarios desactivados en ENCONTROS CON AUTORES

24 Outubro 2012

Club Merlín II

 Comenzamos o luns día 29 ás 18.30 na Biblioteca

Anímate e ven, temos unha “perla” para ti.

Comentarios desactivados en Club Merlín II

21 Marzo 2012

Reunión Club Merlín do 26 de marzo.

 

O próximo luns 26 de marzo celebraremos unha nova sesión do club.

Nesta ocasión contaremos coa presenza do Fernando Bartolomé, autor do libro proposto.

O libro Ceniza é un conxunto de relatos no que podemos atopar distintos temas:

  • A disolución vital da parella de anciás  dependentes ( Filemón e Baucis), un canto ao amor de terceira idade, aínda que ambos cónxuxes se suiciden collidos da man, tras un adeus que leva baixo as rodas do tren o Alzheimer avanzado del e a cegueira total dela. Un entrañable e romántico “pas a deux” cando xa non queda vida digna en común. Pero antes, hai que optimizar a vida, buscarlle un sentido positivo nas súas diferentes etapas.
  • O insensato duelo enolóxico de dous badulaques antagónicos (In vino ¿veritas?)
  • A traxedia familiar do bibliotecario da sinagoga de Mostar, contada nun faladoiro provinciano (Sucedió en Mostar)
  • O sadismo vesánico que provoca a absurda e angustiosa agonía dun sarxento de milicias (Campamento San Gregorio)
  • O tesouro de nadal do Chato David (Otro cuento (triste) de Nadal
  • A dolorosa insania da nai Helena (Morituri)
  • O humor que se mostra na lúcida inconstancia virxinal das tres irmáns zaragozanas (Bendita sea tu pureza)
  • Indestrutible valor dos mitos a pesar dos seus creadores (El miliciano caído)
  • A infernal e apocalíptica fantasmagoría que asola un pobo de pescadores de baleas (Punta Balea)

É obrigado salientar o ámbito próximo dalgúns relatos: descricións da nosa contorna, aquel Vigo inesquecible e aínda próximo dos anos cincuenta e sesenta  ou a suxestiva pintura da praia Ladeira, teatro tráxico dunha das mellores historias. Sen dúbida Fernando Bartolomé  coñece cada esquina, cada recanto e taberna.

Comentarios desactivados en Reunión Club Merlín do 26 de marzo.

7 Marzo 2012

Día internacional da muller: FAITE VER

O Día Internacional da Muller celébrase desde hai máis de nove décadas.

Conmemóranse os esforzos que as persoas realizaron por acadar a igualdade, a xustiza, a paz e o desenvolvemento

Por que o 8 de Marzo?

O motivo principal polo cal se escolleu esta data foron os sucesos neoyorkinos de 1857, cando empregadas dunha fábrica téxtil reclamaron melloras salariais e condicións de traballo dignas. Organizaron unha folga como medio de protesta. Como resposta, a policía reprimiu con bombas provocando a morte de 146 operarias. Estes feitos deron lugar a que a Asamblea Xeral das Nacións Unidas oficializara esta data.

Lentamente, e a medida que a voz da muller foi cobrando forza en todo o mundo, o Día da Muller foi perdendo o seu carácter obreiro, adquirindo o dunha xornada de loita na que se reclaman os dereitos de todas as mulleres en todos os ámbitos.

En numerosos lugares do mundo as mulleres seguen demandando dereitos básicos como acceder á educación, a cultura, o traballo ou a política.

A Declaración dos dereitos humanos no seu artigo nº 1 dí:

“TODOS OS SERES HUMANOS NACEN LIBRES E IGUAIS EN DIGNIDADE E DEREITOS E, DOTADOS COMO ESTÁN DE RAZÓN E CONCIENCIA, DEBEN COMPORTARSE FRATERNALMENTE ENTRE ELES”

 

Comentarios desactivados en Día internacional da muller: FAITE VER
« Previous EntriesPáxina seguinte »